२६ वर्षपछि निर्देशनमा कमव्याक गर्दै जोनी डेप • Osvevo

२६ वर्षपछि निर्देशनमा कमव्याक गर्दै जोनी डेप

Osnepal May 14, 2023
0

लसएन्जल्स, ३० बैशाख । हलिउड अभिनेता जोनी डेप २६ वर्षपछि निर्देशनमा कमव्याक गर्दैछन् ।

उनले बायोपिक ‘मोदी’ मार्फत निर्देशनमा कमव्याक गर्न लागेका हुन् । इटालियन चित्रकार एमेडियो मोदिग्लिआनीको जीवनमा आधारित यो बायोपिकमा इटालियन स्टार रिकार्डो स्कैमार्सियोले शीर्ष भूमिका निर्वाह गर्नेछन् ।

जोनीले यसअघि सन् १९९७ मा रिलिज फिल्म ‘द ब्रेव’ निर्देशन गरेका थिए । यो फिल्ममा जोनी र मार्लन ब्रेडो प्रमुख भूमिकामा थिए ।

पूर्व पत्नी एम्बर हर्डसँग लामो समयको कानूनी लडाई जितेपछि जोनी पुनः पर्दामा कमव्याक गर्न लागेका हुन् । उनको फिल्म ‘जीन डू बेरी’ कान्स फिल्म फेस्टिभलमा प्रिमियर हुँदैछ । रिकार्डोले ‘जोन विकः च्याप्टर २’, ‘द वेस्ट अफ यूथ’ र पाओलो सोरेन्टिनोको ‘लोरो’ जस्ता फिल्ममा अभिनय गरेका छन् ।

फिल्मका लागि पहिलो चरणमा कलाकार फाइनल भइसकेको छ । यसमा पियरे नाइनी र हलिउड अभिनेता अल पाकिनोको पनि अभिनय रहनेछ । फिल्मको सुटिङ आगामी केही महिनामा बुडापेस्टबाट सुरु हुनेछ । अहिले फिल्मका लागि सहायक अभिनेत्रीको खोजी भइरहेको छ । फिल्म डेनिस मेकइन्टायरले लेखेको एक नाटकमा आधारित हुनेछ । यसका लागि जेरजी र मेरी क्रोमोलोव्स्कीले पटकथा तयार पारिरहेका छन् ।

मोदिग्लिआनी एक महान चित्रकार र मूर्तिकार थिए । जोनीको फिल्मले पेरिस सहरमा एमेडियोको सन् १९१६ ताकाको समयको अवस्थालाई देखाउनेछ । फिल्मको कथा दुई दिनको समय सीमामा समेटिने छ । जसमा मोदिग्लिआनी केही हिंस्रक घटनाको सामना गर्छन ।

Leave a Reply

Your email address will not be published. Required fields are marked *

भर्खर